පාකිස්තානුවෝ වි:20 න් ඉහළ නගිති

Monday, September 28, 2015

පකිස්තානය සහ සිම්බාබ්වේ අතර පැවැත්වෙන තරග දෙකකින් සමන්විත විස්සයි විස්ස ක‍්‍රිකට් තරගාවලියේ හරාරේ නුවරදී  (27 දා) පැවැති පළමු තරගයෙන් ලකුණු 13 ක ජයක් ලැබූ පකිස්තානය ජාත්‍යන්තර විස්සයි විස්ස ශ්‍රේණිගත කිරීම්වල දෙවැනි ස්ථානය තහවුරු කර ගැනීමට සමත් විය.

මේ වසරේදී පකිස්තානය සහභාගි වූ හය වැනි විස්සයි විස්ස තරගය මෙය වූ අතර එහිදී පිට පිටම ජයගත් පස්වැනි තරගය මෙය වේ. වසර ආරම්භයේදී විස්සයි විස්ස ශ්‍රේණියේ හය වැනි ස්ථානයේ සිටි පකිස්තානුවන් මෙම ජයග‍්‍රාහී රැුල්ලත් සමග ප‍්‍රසාද ලකුණු 121 ක් ලබා තිබේ. පකිස්තානුවන් අදාළ ශ්‍රේණියේ දෙවැනි වන්නේ ප‍්‍රසාද ලකුණු 126 ක් ලබා සිටින ශ‍්‍රී ලංකාවට පමණි.

පසුගිය අපේ‍්‍රල් මාසයේ බංග්ලාදේශයේදී කඩුලූ හතක පරාජයක් ලැබූ පකිස්තානුවන් අනතුරුව සිම්බාබ්වේට එරෙහිව තරග දෙකක් සහ ශී‍්‍ර ලංකාවට එරෙහිව තරග දෙකක් ජය ගනිමින්, සිම්බාබ්වේ බලා පිටත් වූයේ කලගුණ සැලකීමේ තරගාවලියකට සහභාගි වීම සඳහාය.

කිසිම රටක ජාතික කණ්ඩායමක් පකිස්තානයේ තරග නොකිරීමට තීරණය කර තිබියදී සිම්බාබ්වේ කණ්ඩායම ඉකුත් මැයි මස පකිස්තානයට ගොස් එක්දින තරගාවලියකට සහ විස්සයි විස්ස තරගාවලියකට සහභාගි විය. එම තරගාවලියට සිම්බාබ්වේ පැමිණීම හේතුවෙන් පකිස්තානුවන් මෙම සංචාරයට සහභාගි වීමට එකගත්වය පළ කර තිබුණි.

පකිස්තාන් නායක සහිඞ් අෆ්රීඩි කාසියේ වාසිය දිනා ගනිමින් පළමුව පන්දුවට පහරදීම තෝරාගත්තද ඔවුන්ට ලබාගත හැකිවූයේ කඩුලූ අටක් අහිමිව ලකුණු 136 ක් පමණි.

විස්සයි විස්ස තරගයකදී පකිස්තානයට එරෙහිව කිසිදු ජයග‍්‍රහණයක් නොලද සිම්බාබ්වේ පිතිකරුවන්ට ජයග‍්‍රහණය සඳහා අවසන් පන්දු 25 දී කඩුලූ තුනක් අතැතිව ලකුණු 47 ක් ලබා ගැනීමට තිබුණි. එහිදී ඔවුන්ට ලබාගත හැකිවූයේ කඩුලූ 2 ක් දැවී යන විට ලකුණු 33 ක් පමණි. සිම්බාබ්වේ කණ්ඩායමේ ජයග‍්‍රාහී සිහිනය බොඳ කර දැමූ 26 හැවිරිදි වමත් දග පන්දු යවන්නා වූ ඉමාඞ් වසීම් ලකුණු 11 කට කඩුලූ 4 ක් බිද දැමුවේය. දුවද්දී දවා ගැනීම් දෙකකට දායක වූ ඉමාඞ් අභියෝගයකින් තොරවම තරගයේ වීරයා සම්මානයට පාත‍්‍ර විය.

සිම්බාබ්වේ කණ්ඩායමේ පළමු කඩුලූ පහ ලකුණු 66 කට දැවී යද්දී ඉන් කඩුලූ හතරකම අයිතිකරුවා වූ ඉමාඞ් වසීම් පකිස්තානු විස්සයි විස්ස කි‍්‍රකට් ඉතිහාසයේ හයවැනි හොඳම පන්දු යැවීම සටහන් කළේය. කෙසේ වෙතත් ඉමාඞ් මෙම තරගයට සහභාගි වීමට පෙර සහභාගි වූ විස්සයි විස්ස තරග තුනකදී ලබා තිබුණේ කඩුල්ලක් පමණි.

පකිස්තානු ඉනිමේ පළමු කඩුලූ තුන ලකුණු 29 දී දැවී ගියද පළමුව දැවී ගිය  පිතිකරුවා වූ අහමඞ් ෂෙශාඞ් මිනිත්තු 20 කදී මුහුණ දුන් පන්දු 19 න් හතරේ පහර තුනක් සමග ලකුණු 17 ක් ලබා ගත්තේය.

අංක හතර පිතිකරු ලෙස පැමිණි ෂොයිබ් මලික් පන්දු 24 කදී හයේ පහරක් සහ හතරේ පහර දෙකක් සමග කණ්ඩායමේ වැඩිම ලකුණු (35) ලාභියා ලෙස පස්වැනි කඩුල්ලට පිටියෙන් ඉවත් වන විට පකිස්තානු ලකුණු පුවරුව පන්දු  ඕවර 14.2 කදී ලකුණු 87 ක් ලෙස සටහන් විය.

පකිස්තානුවන්ගේ කඩුලූ රකින්නා වූ මොහොමඞ් රිස්වාන් අංක හය පිතිකරු ලෙස පැමිණ පන්දු 32 කදී හයේ පහරක් සහ හතරේ පහරක් සමග නොදැවී ලකුණු 33 ක් ලබා ගනිද්දී අංක හත පිතිකරුවා වූ ඉමාඞ් වසීම් පන්දු 12 කදී හයේ පහරක් සහ හතරේ පහරක් සමග ලකුණු 19 ක් ලබා නොගන්නට තරගයේ තීරණය වෙනස් කිරීමට සිම්බාවේ පිතිකරුවන්ට හැකියාවක් තිබුණි.

පකිස්තාන් නායක සහිඞ් අෆ්රීඩි අංක අට පිතිකරු ලෙස පැමිණියද ඔහුට ලබාගත හැකිවූයේ ලකුණු දෙකක් පමණි. පන්දු යැවීමේදීද අසාර්ථක වූ අෆ්රීඩි යවන ලද පන්දු  ඕවර තුනේදී ලකුණු 23 ක් ලබා ගැනීමට සිම්බාබ්වේ පිතිකරුවෝ සමත් වූහ.

පකිස්තාන් පන්දු යවන්නන්ට සටනක් දුන් ආරම්භක පිතිකරු හැමිල්ටන් මස්කඞ්සා පන්දු 25 කදී හතරේ පහර දෙකක් සමග ලකුණු අතරට පැමිණෙමින් සිටියදී සිව්වැනි කඩුල්ලට පිටියෙන් ඉවත් විය. ඉන්පසු සිම්බාබ්වේ ලකුණු පුවරවට කැපී පෙනෙන දායකත්වය සැපයූ නායක එල්ටන් චිගුම්බුරා පන්දු 28 කදී හතරේ පහර දෙකක් සහ හයේ පහරක් සමග කණ්ඩායමේ වැඩිම ලකුණු (31) ලාභියා වෙමින් තමාගේ පිල ජයග‍්‍රහණය පෙනෙන නොපෙනන තරම් දුරකට ගෙන ආවේය.

චිගම්බුරා අවසන් පන්දු  ඕවරයේ පළමු පන්දුවෙන් දැවී යාමට පෙර සිම්බාබවේට ජයග‍්‍රහණය සඳහා අවසන් පන්දු හයෙන් ලකුණු 16 ක් ලබා ගත යුතුව තිබුණි. එහිදී චිගුම්බුරා නව වැනි කඩුල්ල ලෙස 20 වැනි පන්දු  ඕවරයේ පළමු පන්දුවටම දුවද්දී දැවී ගියේය.

දෙරට අතර පැවැත්වෙන දෙවැනි විස්සයි විස්ස තරගය ලබන 29 වැනිදා හරාරේ නුවරදී පැවැත්වේ.

පකිස්තානය පන්දු  ඕවර 20 කදී කඩුලූ 8ට ලකුණු 136 යි.

(අහමඞ් ශේෂාඞ් 17, ෂොයිබ් මලික් 35, උමාර් අක්මාල් 14, මොහොමඞ් රිස්වාන් නොදැවී 33, ඉමාඞ් වසීම් 19, චමූ චිබාබා 18/3 යි)

සිම්බාබ්වේ පන්දු  ඕවර 20 කදී කඩුලූ 9ට ලකුණු 123 යි.

(හැමිල්ටන් මස්කඞ්ෂා 25, සීන් විලියම්ස් 14. එල්ටන් චිගම්බුරා 31, ඉමාඞ් වසීම් 11/4 යි)

Read Post | comments

ජපානයෙන් විශාලතම පෙරළියක්

න්තර්ජාතික රග්බි ක්‍රීඩාවේ දී ලෝක කුසලාන තරගාවලියන් දෙකක් පැවැත්වෙයි. ඒ රග්බි සංගම් සහ රග්බි ලීග් වශයෙනි. රග්බි සංගම් සහ රග්බි ලීග් ක්‍රීඩාවන්හිදී කණ්ඩායමකට ක්‍රීඩා කරන ක්‍රීඩකයන් ප්‍රමාණය සහ සමහර නීති රීති වෙනස් වේ. මින් ශ්‍රී ලංකාව ඇතුළුව ලොව වඩාත්ම ජනප්‍රියතම වන්නේ රග්බි සංගම් ක්‍රීඩාවයි. මේ වන විට පැවැත්වෙන්නේ රග්බි සංගම් ලෝක කුසලාන තරගාවලියයි.

මෙවර පැවැත්වෙන්නේ එහි 08 වැනි තරගාවලියයි. රග්බි ඇතුළුව ජනප්‍රිය ක්‍රීඩා කිහිපයක්ම ලොවට හඳුන්වා දුන් එංගලන්තය මෙවර තරගාවලියේ සත්කාරක රට වේ. ඔවුන් ලෝක කුසලාන රග්බි සංගම් තරගාවලියක සත්කාරකත්වය 1991 වසරේදී ද දරනු ලැබීය.

08 වැනි රග්බි ලෝක කුසලාන තරගාවලිය සැප්තැම්බර් මස 18 සිට ලබන ඔක්තෝබර් මස 31 දක්වා පැවැත්වීමට නියමිතය. ඊට සුදුසුකම් ලබා තිබෙන රටවල් ගණන 20 කි. මේ අතරින් ආසියාව නියෝජනය කරන එකම රට වන්නේ ජපානයයි. මේ දක්වා පැවැති තරගවලදී විශාලතම පෙරළිය සිදු කිරීමට සමත්වූයේද ජපානයයි. ඒ මුල් වටයේ තරගයකදී ප්‍රබල දකුණු අපි‍්‍රකාව ලකුණු 34 - 32 කින් පරාජය කරමිනි.

වත්මන් අන්තර්ජාතික කණ්ඩායම් වර්ගීකරණයේ දී දකුණු අප්‍රිකාවට අංක 03 සහ ජපානයට අංක 13 ස්ථානයන් හිමි වී තිබේ. එමෙන්ම 1995 සහ 2007 දී ලෝක ශූරයෝ වූයේද ඔවුන්මයි. ඔවුන් ජපානය හමුවේ තරගයක් පරාජය වූයේත් පළමු වතාවටයි. මෙම විශිෂ්ට ජයග්‍රහණය ලැබීමට පෙර ලෝක කුසලාන රග්බි තරගාවලියන්හිදී ජපානයට පිට පිටම තරග 18 කම ජයක් ගැනීමට හැකි වූයේ නැත. ඔවුන් අවසන් වරට ජයග්‍රහණයක් ලැබුවේ 1991 දී සිම්බාබ්වේට එරෙහිවය. ඒ ලකුණු 52 - 08 ක් වශයෙනි.

මෙවර තරගාවලියේ ප්‍රථම තරගයෙන් එංගලන්තය ජය ගත්තේ ලකුණු 35 - 11 කින් ෆීජි පරාජය කරමිනි. එංගලන්තය උත්සාහ කරන්නේ රග්බි සංගම් ලෝක කුසලාන ශූරතා 02 ක් ජය ගත් සිවුවන රට බවට මෙවර පත්වීමටයි. කෙසේ වෙතත් මේ වන විට ජපානයට අමතරව පෙරළිකාර ජයක් ලැබූ තවත් රටක් වේ. ඒ ජෝර්ජියාවයි. ඔවුන් ලකුණු 17 - 10 කින් ටොංගා කණ්ඩායම පරාජය කරන ලදී. ජෝර්ජියාව සහභාගි වන සිව්වන ලෝක කුසලාන තරගාවලියත් එහිදී ඔවුන් ජයගත් තෙවන තරගයත් මෙය වේ. මීට පෙර ඔවුන් 2007 දී නැමීබියාවත් 2011 දී රුමේනියාවත් පරාජය කරනු ලැබූහ.

ටොංගා සමඟ පැවැති තරගයට ක්‍රීඩා කරමින් නව වාර්තාවක් පිහිටුවීමට ජෝර්ජියාවේ 18 හැවිරිදි වැසිල් ලොබ්ස්හානිඩ්සේ සමත් වූයේය. එනම් ලෝක කුසලාන තරගාවලියකට සහභාගි වූ ළාබාලතම ක්‍රීඩකයා වීමයි. මීට පෙර වාර්තාව 2007 තරගාවලියේදී පිහිටුවා තිබුණේ ඇමෙරිකාවේ ට්‍රොටොන් පැලැමෝ විසිනි. එවිට ඔහුගේ වයස අවුරුදු 19 දින 08 කි.

මේ අතර ගියවර ශූරයෝ වන ඕල් බ්ලැක්ස් නමින් ප්‍රකට නවසීලන්තය මෙවර ඔවුන්ගේ ප්‍රථම තරගයේදී ලකුණු 26 - 16 ක ජයක් ලැබුවේ ආර්ජන්ටිනාව හමුවේදීය. එම තරගය සුප්‍රකට වෙම්බ්ලි ක්‍රීඩාංගණයේදී නැරැඹූ පිරිස 89,000 ඉක්මවීය. එයත් වාර්තාවකි. එනම් ලෝක කුසලාන රග්බි තරගයක් නැරැඹූ වැඩිම පිරිස එය වීමෙනි. මීට පෙර වාර්තාව වූ 82,957 ක පිරිසක් 2003 අවසන් මහ තරගය නරඹා තිබුණාහ.

තවමත් ලෝක ශූරතාවක් හිමිකර ගැනීමට හැකි වී නැති ප්‍රංශය මෙවර ඔවුන්ගේ ප්‍රථම තරගයේදිම අසල්වැසි ඉතාලිය ලකුණු 32 - 10 කින් පරාජය කළහ. මෙම දෙරටේම ප්‍රධාන පුහුණුකරුවන් වන්නේ ප්‍රංශ ජාතිකයන්මයි. ප්‍රංශයට ලෝක කුසලාන අනුශූරතා 03 ක්ම හිමි විය. වත්මන් ලොව අංක 01 හිමි නවසීලන්තය මෙවර තරගාවලියත් ජයගතහොත් පිට පිට රග්බි සංගම් ලෝක කුසලාන ශූරයන් වූ ප්‍රථම රට බවට නව වාර්තාවක් පිහිටුවනු ඇත.

Read Post | comments

යුවරාජ්ට නව පෙම්වතියක්

Wednesday, September 23, 2015

වසර ගණනාවක සිටම ඉන්දීය ක්‍රිකට් ක්‍රීඩාවේ සිහින කුමාරයා ලෙස හැඳින්වෙන්නේ යුවරාජ් සිංය. ඊට ඔහුගේ කඩවසම් බවත් ක්‍රීඩාමය හැකියාවත් බලපා තිබේ. මේ වන විට 34 හැවිරිදි වියේ පසුවන යුවරාජ් ක්‍රිකට් ක්‍රීඩාවේදී තුන් ඉරියව්වටම දස්කම් දක්වයි. ඒ වමත් පිතිහරඹය, වමතින් දඟ පන්දු යැවීම සහ පන්දු රැකීමටයි.

පසුගිය කාලයේ දී මේ සුපිරි ක්‍රීඩකයාගේ ක්‍රිකට් දස්කම්වලට වඩා මාධ්‍ය මඟින් වැඩි ප්‍රසිද්ධියක් ලබා දුන්නේ ඔහුගේ පෞද්ගලික දිවියටයි. එයිනුත් ඔහුගේ පෙම් සබඳතාවන්ටයි. බොලිවුඩයේ සුරූපි නිළියන් සහ මෝස්තර නිරූපිකාවන් රැසක්ම යුවරාජ්ගේ පෙම්වතියන් ලෙසට සිටියහ.

ඒ අතරට කිම් ෂර්මා, ප්‍රීති සින්ටා, දීපිකා පදුකෝන්, ශිල්පා ෂෙට්ටි, ජෙනිෆර් කොට්වාල්, සෝනම් කපූර්, අම්රිටා අරෝරා, අමීෂා පටෙල් අයත් වෙති.

ඉකුත් කාලයේ දී යුවරාජ්ගේ පෙම්වතිය වූයේ නේහා දූපියාය. ඇය මුලින්ම රූප සුන්දරියකි. පසුව මෝස්තර නිරූපිකාවක් සහ නිළියක් ලෙසටත් ජනප්‍රිය වූවාය. මෙම සබඳතාවයත් මේ වන විට නිමාවට පත් වී තිබේ. ඒ යුවරාජ්ට නව පෙම්වතියක් සිටින බැවිනි. ඇය නමින් හේෂල් කීච්ය.

හේෂල් එංගලන්තයේ උපත ලැබූ මෝස්තර නිරූපිකාවක් සහ නිළියකි. ඇය බිලා (2007) දමිළ සහ බොඩිගාර්ඩ් (2011) හින්දි චිත්‍රපටිවල රඟපා තිබේ. ඇය කලක් රෝස් ඩෝන් යන නම භාවිතා කළාය. ඇගේ පියා බ්‍රිතාන්‍ය ජාතිකයෙකි. මව මුරුසි කතකි. හේෂල් වයස අවුරුදු 18 දී ඉන්දියාවට පැමිණියේ නිවාඩුවක් ගත කිරීමටයි. පසුව ඇය පදිංචිය සඳහා එරටම තෝරා ගත්තාය. යුවරාජ්ගෙන් නව පෙම්වතිය පිළිබඳ විමසූ විට ඔහු පවසා තිබෙන්නේ ඇය මිතුරියක බවය. කෙසේ වෙතත් යුවරාජ් සහ හේෂල් පසුගියදා ලන්ඩන් නුවර විවේකයෙන් ගත කළ බව වාර්තා වේ.

Read Post | comments

'බව්වා' බිරුවැයි කළුවිතාරණගෙන් පැමිණිල්ලක්‌

1996 ලෝක ශූර ශ්‍රී ලංකා ක්‍රිකට්‌ කණ්‌ඩායමේ ප්‍රබලම සාමාජිකයකු මෙන්ම වත්මන් ශ්‍රී ලංකා "ඒ" කණ්‌ඩායමේ ප්‍රධාන පුහුණුකරු රොමේෂ් කළුවිතාරණට, ජාතික කණ්‌ඩායමේ සහයක පුහුණුකරුවකු ලෙස සිටින පුද්ගලයකු කරන ලද තර්ජනයක්‌ සම්බන්ධව ශ්‍රී ලංකා ක්‍රිකට්‌ ආයතනයට පැමිණිල්ලක්‌ ලැබී ඇත.

ශ්‍රී ලංකා ජාතික ක්‍රිකට්‌ කණ්‌ඩායමේ පන්දුව විසිකිරීමට මෙන්ම වත්මන් පන්දු රැකීමේ පුහුණුකරු ලෙස "ලේබල්" ගතව සිටින අදාළ තැනැත්තා විසින් රොමේෂ් කළුවිතාරණට මෙසේ තර්ජනය කර ඇති බව වාර්තා වේ.

කොළඹ ආර්.ප්‍රේමදාස ක්‍රීඩාංගණයේදී ශ්‍රී ලංකා "ඒ" කණ්‌ඩායමේ ක්‍රීඩකයන්ට පුහුණුවීමට තණතීරුවක්‌ ලබා ගැනීමට කළ උත්සහයකදී කළුවිතාරණ කියු කතාවක්‌ සම්බන්ධව උරණ වූ අදාළ තැනැත්තා කළුවිතාරණට මරණ තර්ජන කරමින් කෑ කෝ ගසා ඇති අතර එතන සිටි කිහිප දෙනකු ඒ සම්බන්ධව කළුවිතාරණට දැනුම් දී තිබේ. අනතුරුව කළුවිතාරණ ඒ සම්බන්ධව ශ්‍රී ලංකා ක්‍රිකට්‌ ආයතනයට පැමිණිලි කර ඇත.

"ක්‍රිකට්‌ ගහපු කෙනෙක්‌ තමයි ක්‍රිකට්‌ ගැන දෙයක්‌ දන්නෙ" යනුවෙන් කළුවිතාරණ විසින් අවිශ්ක ගුණවර්ධනට පවසා ඇතැයි වාර්තා වේ. එහිදී පළමු පෙළ හෝ ක්‍රිකට්‌ ක්‍රීඩා නොකර ශ්‍රී ලංකා ක්‍රීඩකයන්ට පන්දු රැකීමේ පුහුණුවට මෙන්ම පිතිකරණ පුහුණුවටද පන්දුව විසි කරන තැනැත්තා උරණ වී ඇතැයි "දිවයින" කළ සොයා බැලීමකදී අනාවරණය විය. "බව්වා" යන අන්වර්ථ නාමයෙන් හඳුන්වනු ලබන මෙම පුද්ගලයා ආර්.ප්‍රේමදාස ක්‍රීඩාංගණයේ කාර්යාලයේ සේවය කරන කාන්තාවකටද "චණ්‌ඩි පාට්‌" දමා ඇති බවත් එම කාන්තාවද ඒ සම්බන්ධව පැමිණිලි කර ඇති බවත් වැඩිදුරටත් වාර්තා වේ.

කෙසේ වෙතත් මේ සම්බන්ධව පරීක්‍ෂණයක්‌ පැවැත්වීම සඳහා ශ්‍රී ලංකා ක්‍රිකට්‌ ආයතනයේ ප්‍රධානීන් විසින් ශ්‍රී ලංකා ක්‍රිකට්‌ දුෂණ මර්දන ඒකකයට පවරා ඇත. ඒ සම්බන්ධයෙන් හිටපු ජ්‍යෙෂ්ඨ පොලිස්‌ අධිකාරි ලක්‍ෂ්මන් ද සිල්වා මහතා පරීක්‍ෂණයක්‌ පවත්වා තිබේ.

අදාළ පරීක්‍ෂණයේදී සිදුවූ දෙය පිළිබඳව සොයා බලා ඇති අතර එම සිදුවීම එතැනින් අහවර කිරීමට නියමිතව ඇතැයි ක්‍රිකට්‌ ආයතන නිලධාරියකුගෙන් වාර්තාවේ. ක්‍රිකට්‌ ක්‍රීඩාවේ විනය රැක ගැනීම සහ ජාතික කණ්‌ඩායමක පන්දුව විසි කිරීමට හෝ ක්‍රිකට්‌ පිළිබඳව හසල දැනුමක්‌ ඇත්තකු පත්කර ගැනීමට ශ්‍රී ලංකා ක්‍රිකට්‌ ප්‍රධානීන් අසමත්වීම මෙවැනි ගැටුම් නිර්මාණය වීමේ ප්‍රධානතම හේතුව බව තතු දත් උදවිය "දිවයින" ට පැවසීය. 

කෙසේ වෙතත් ක්‍රීඩකයන් සමග ඉතාම සමීපයෙන් කටයතු කරන "බව්වා" නමැත්තාට ඉදිරියටත් එම රාජකාරිය කරගෙන යැමට හැකි වටපිටාවක්‌ අදාළ සිදුවීමෙන් පසුවද සකස්‌වී තිබීම විශේෂත්වයකි.

Read Post | comments

තහනම් උත්තේජක ගත් අචලා ශාලිකා ඩයස්ට වසර 4ක තහනමක්

Tuesday, September 22, 2015

ජාතික මලල ක්‍රීඩා සංචිතයට ඇතුළත්ව සිටි අචලා ශාලිකා ඩයස් ක්‍රීඩිකාවට වසර 4ක තරග තහනමක් පැනවීමට ශ්‍රී ලංකා උත්තේජක මර්දන නියෝජ්‍යායතනය නිර්දේශ කර තිබේ.

ඉකුත් මැයි මාසයේ පවත්වනු ලැබූ ලෝක ශූරතා මලල ක්‍රීඩා තේරීම් තරග උළෙ‍ලේදී මීටර් 100 තරගයට සහභාගි වී දෙවැනි ස්ථානය දිනාගත්  ශාලිකා ඩයස්ගෙන් ලබාගත් මුත්‍රා සාම්පලයේ ‘ඒ’ නියැදිය තුළ මෙටනොලෝන් සහ ටේ‍රන්බොලෝන් නමැති තහනම් ශරීර උත්තේජක සංඝටක අඩංගු වී ඇති බවට සිදුකරන ලද රසායනාගාර පරීක්ෂණවලදී අනාවරණය වී තිබේ.

මේ පිළිබඳව ශ්‍රී ලංකා උත්තේජක මර්දන නියෝජ්‍යායතනය කරන ලද විනය කමිටු පරීක්ෂණයකින් අනතුරුව එම කමිටුවේ ඒකමතික තීරණය අනුව අදාළ ක්‍රීඩිකාව එම චෝදනාවලට වරදකාරිය බවට පත්කර තිබේ.

ඒ අනුව ලෝක උත්තේජන මර්දන නීති සංග්‍රහයේ 2:1 උප වගන්තියට අදාළ නීති සංග්‍රහයට අනුව මෙම ක්‍රීඩිකාවට එරෙහිව වසර 4ක තරග තහනමක් පැනවීමට තීරණය කර ඇති බව  (21දා) කොළඹදී පැවැති මාධ්‍ය හමුවකදී ශ්‍රී ලංකා උත්තේජන මර්දන නියෝජ්‍යායතනයේ අධ්‍යක්ෂ ජනරාල් වෛද්‍ය සීවලී ජයවික්‍රම මහතා සඳහන් කර සිටියේය.

ලෝක උත්තේජක මර්දන නියෝජ්‍යායතනය පනවනු ලැබූ 2015 නව නීති සංග්‍රහයේ වගන්ති අනුව අදාළ වරද සඳහා උපරිම දඬුවම් කාලය වසර 4ක් ලෙස නිර්දේශ කර ඇති අතර, ඒ අනුව ශ්‍රී ලංකාව තුළදී එම වසර 4 දඬුවමට යටත් වන පළමු ක්‍රීඩිකාව බවට පත්ව ඇත.

තම ආයතනය විසින් කරනු ලැබූ මෙම නිර්දේශයන් සුදුසු පියවර ගැනීම සඳහා ශ්‍රී ලංකා මලල ක්‍රීඩා සංගමය වෙත යොමු කරන බවද එහිදී වෛද්‍ය සීවලී ජයවික්‍රම මහතා වැඩිදුරටත් සඳහන් කර සිටියේය.

Read Post | comments