විදෙස් රැකියා සිහින මවා නව ලක්ෂයක් වංචා කරලා

සයිප්‍රස් රටේ රැකියා ලබාදෙන බව පවසා තරුණයකුගෙන් රුපියල් නව ලක්ෂ විසි දහසක් වංචා සහගතව ලබාගත් සිද්ධියක අතරමැදියා ලෙස කටයුතු කළ පුද්ගලයා ගම්පහ මූලස්ථාන පොලිසියේ විශේෂ අපරාධ විමර්ශන අංශය මඟින් අත්අඩංගුවට ගෙන ඇත.

සයිප්‍රස් රටේ රැකියාවක් කරන අලුත්ගම දර්ගා නගරයේ පදිංචි පුද්ගලයකු එහි රැකියාවක් ලබාදීම සඳහා ඔහුගේ බිරියගේ පියාගේ බැංකු ගිණුමට රුපියල් නව ලක්ෂ විසිදහසක් තැන්පත් කරන ලෙස දැන්වූවත් මෙතෙක් පොරොන්දුව ඉටු නොවීම නිසා තමාට එම මුදල් ආපසු ලබාදෙන ලෙස ඉල්ලා, අංක 83/4, වටද්දර පාර, වේයන්ගොඩ ලිපිනයේ පදිංචි බී. සී. නුවන් ලක්සිරි නැමැත්තා ගම්පහ මූලස්ථාන පොලිසියේ විශේෂ අපරාධ විමර්ශන අංශයේ පැමිණිල්ලක් කර ඇත.

පැමිණිල්ල අනුව ගම්පහ කොට්ඨාසභාර ජ්‍යෙෂ්ඨ පොලිස් අධිකාරී විජිත ඩී. කොමසාරු මහතාගේ උපදෙස් මත පරීක්ෂණ පවත්වා මේ ගනුදෙනුවේ දී මුදල් තැන්පත් කළ ගිණුම හිමි පුද්ගලයා පොලිස් භාරයට ගෙන අත්තනගල්ල මහේස්ත්‍රාත් අධිකරණය හමුවට පමුණුවා තිබුණි.

නඩු විභාගයට ගත් අත්තනගල්ල මහේස්ත්‍රාත් චලනී පෙරේරා මහත්මිය, වරකට රුපියල් 60000 බැගින් මාස්පතා වාරික වශයෙන් ලබාගත් මුදල ගෙවා අවසන් කරන ලෙසට ද එතෙක් සෑම මසකම අවසාන ඉරුදින පොලිසියේ පෙනී සිටින ලෙසට ද නියෝග කර එකක් රුපියල් ලක්ෂ හත බැගින් වටිනා ශරීර ඇප දෙකක් මත විත්තිකරු මුදා හරින ලදී.