උසාවි කටයුතුවලට බාධා කරලා ප්‍රාදේශීය සභාපති කූඩුවේ දමලා

ලග්ගල සංචාරක අධිකරණයේ පෙනී සිටීමට නියමව සිටි විල්ගමුව ප්‍රාදේශීය සභාවේ සභාපති ජයන්ත වීරසේකර මහතා අධිකරණ කටයුතුවලට බාධා වන අයුරින් හැසිරීම නිසා අධිකරණ සිරමැදිරියට දමා චෝදනා ගොනු කරන ලෙස නාඋල මහහේස්ත්‍රාත් රංගනී ගමගේ මහත්මිය  (01) උදේ නියෝග කළාය. මේ අනුව අත්අඩංගුවට ගැනුන සභාපතිවරයා උසාවි සිර මැදිරියට දමනු ලැබීය. විල්ගමුව හිටපු පොලිස් ස්ථානාධිපතිවරයාට ‍එරෙහිව පැවැති විරෝධතාවකට සම්බන්ධ පුද්ගලයන් 16 දෙනකුට නඩු පවරා තිබිණ. එම නඩුව  (01) කැඳවා තිබිණ. නඩු විභාගය සඳහා චූදිතයන්14 දෙනෙක් අද පෙනී සිටි අතර විල්ගමුව ප්‍රාදේශීය සභාපතිවරයාද එක් චූද්තයෙකි. 

 ඔහු සහ තවත් අයෙක් මෙදින නඩු විභාගය කැඳ වූ අවස්ථාවේ උසාවිය හමුවේ පෙනී සිටියේ නැත. නමුත් නඩු විභාගය ආරම්භ වීමෙල් පසු සභාපතිවරයා සෙසු චූදිතයන් අතරට පැමිණෙන අයුරු දුටු මහේස්ත්‍රාත්තුමිය ඔහුට විවෘත අධිකරණයේ දී දැඩි ලෙස අවවාද කළේය. අනතුරුව උසාවි කටයුතුවලට බාධා සිදුවන ආකාරයට හැසිරීම නිසා අත්අඩංගුවට ගෙන උසාවි සිර මැදිරියේ රඳවා ‘බී’වර්ථාවක් ඉදිරිපත් කරන ලෙසට පොලිසියට නියෝග කළේය. ඒ අනුව අද සවස තුනෙන් අවසන් වන උසාවි කටයුතුවලින් පසු ‘බී’වාර්තාවක් උසාවියට ඉදිරිපත් කිරීමට නියමිතය. එතෙක් සභාපතිවරයාට උසාවි සිරමැදිරියේ පසුවන්නට සිදු වෙයි.