Saturday, February 23, 2013

හදේ කොතැනක හෝ හිඳී ඔබ!

නින්ද යනු තාවකාලික මරණය යැයි අපට සිතාගත හැකි ය. මේ තාවකාලික මරණයට අප හැම දෙනාම ප්‍රිය ය. එය එතරම් ම සුවදායක දෙයක් වන හෙයින් ය. මරණයෙන් පසු නැවත උපදින අලුයම් යාමය අපේ අලුත උපන් ළදරු සිතට අප්‍රමාණ සැනසිල්ලක් ම දෙන්නේය.

නමුත් ඇසිපිය ඇරුණු ඇසිල්ලේ සිට ම මේ ළදරු සිත පිරී ඉතිරෙන්නට පටන් ගන්නේ විවිධාකාර සිතුවිලි වලිනි. මේ සිතුවිලි අතර අතීත මතකයන්ද පෙරහරේ එනවා ඇත. දවුල් ගසාගෙන - බෙර වයාගෙන - කස පුපුරවාගෙන - අලි ඇතුන් පිරිවරාගෙන මේ මතක පෙරහර ඇදී එයි. මේ පෙරහරේ විශේෂිතම තැනක ඔබේ ආදර මතකය වැඩමවනවා ඇත. එවිට ඔබේ හදවත ගැහෙයි. වේගයෙන් ගැහෙයි. එවිට ඔබට හැෙඟන්නේ ඒ හදේ කොනක තම අතීත ආදරය කැටි වෙලා ඇති බව ය. ඔව්... නින්දක් නොනින්දත් අතරේ ඔබ තාමත් හදවතේ සිටිනවාම ය.

හදේ කොතැනක හෝ හිඳී ඔබ
නිදා නොනිඳා මෙන්
බලා අවසර සොයා කල් දැන
වෙලා ගත රැහැනින්

පෙලයි මා - මුදා සුව දැහැනින්
සයුරු ඉම රන් සිතිජ රේඛාවේ
මියෙන හිරු සේ ගිලී බිම් අඳුරේ
තලා මා සිත පලා ගිය ඔබ

දවයි මා අද - තනිවෙනා මොහොතින්
උතුම් පිවිතුරු ප්‍රේමයේ නාමෙන්
සහස් සුවහස් පැතුම් බල මහිමෙන්
ඉනූ කඳුළ ද සිඳෙන්නට පෙර
යදින්නම් ඔබ - මැකී යනු මතකෙන්
පද - කුමාරදාස සපුතන්ත්‍රි
සංගීතය - රෝහණ වීරසිංහ
ගායනය - සුනිල් එදිරිසිංහ

ප්‍රවීණ ගේය පද රචක කුමාරදාසයන් අතින් මේ ගීය ලියැවුණේ අසූව දශකයේ මුලදී. ප්‍රේම ගීත යනු බොළඳ ගීත යැයි ගර්හාවට ලක්කොට ඉවතලිය නොහැක්කේ ප්‍රේමය පිළිබඳව අර්ථ සාරව ලියැවුණු මෙවන් ගීත නිසා යැයි සිතෙයි. යම් අත්දැකීමක් මේ ගීයට පාදක කරගත් සපුතන්ත්‍රී එය පොදු අත්දැකීමක් ලෙස ඉදිරිපත් කළ බව කියයි. ප්‍රේමයේ විරහව ඉසියුම්ව හා හෘදසංවේදී කලාත්මක ස්වරයෙන් කියැවෙන මේ ගීය ජනතාව ද වැලඳ ගත්තේ ආදරයෙනි. 

තමා අතැර ගිය ප්‍රේමවන්තිය විසින් තම ජීවිතයට කරන ලද්දා වූ අලාභහානිය සුළුපටු දෙයක් නොවේ. රත්වුණු ක්ෂිජ රේඛාවේ ළය පැලී මිය යන හිරු සේම ඔහුගේ සිත ඈ තලා පෙළා නික්ම ගිහිල්ලා ඇත. තනිවෙන හැම මොහොතකම ඈ යළි යළිත් ඒ බිඳුණු හද කැබලි අස්සෙන් ඇමිණි ඇමිණී ඔහුගේ හදවත පාරවා දමලා ඇත.

නමුත් නිදා නොනිදා වගේ ඔහු හද තුළ ඈ හිඳින ඉඳිල්ල නම් ඔහුට සුවදායක දෙයක් වෙලා නැත. පිවිතුරු ප්‍රේමයේ නාමයෙන් අතීත ප්‍රාර්ථනා බල මහිමයෙන් ඔහු ඇගෙන් ඉල්ලා සිටින්නේ එකම එක දෙයකි. ඒ ඉනූ කඳුළ සිදෙන්නට පෙර වහාම මතකයෙන් නික්මී යන ලෙස ය...

ආදරයෙන් හදවතට කැඳවීමට වඩා ආදරයෙන් හදවතින් නෙරපා දැමීම මොන තරම් කඨෝර දෙයක් දැයි ඔබට තේරෙනවා ද? නමුත් ආදරයේ කැඳවීම - බිඳවීම හා රිදවීමට පස්සේ ඉතිරි වන්නේ නෙරපා හැරීම විතරක් නොවේද?

මේ සියලු විඳවීම් මනා ලෙස පෙළ ගස්වන මේ පදමාලාවේ පොහොසත්කම සිතට දෙන වින්දනය අපූරු ය. සපුතන්ත්‍රි රචකයාණන් කියන අන්දමට ගීයේ විශිෂ්ට සාර්ථකත්වය පසුපස ඇත්තේ රෝහණ ගේ සංගීතයයි. රෝහණ වීරසිංහ මේ විරහව තීව්‍ර කිරීම සඳහා ඉන්දීය ගසල් ගීත ශෛලිය උපයෝගී කරගත් බව පවසයි. රාගධාරි සංගීතයේදී ශෝක රසය තුළින් කරුණ රසය ජනනය කිරීම සඳහා යොදාගත් මේ යමන් කළ්‍යාණ රාගයේ ඇසුර මොනතරම් හෘදාසන්න වින්දනයක් ලබාදී ඇත්දැයි වචනයෙන් කිව නොහැකි තරම්. යම් යම් විශේෂ ස්ථානවලදී වාදනය නතර කොට ගායකයාගේ හඬ ඉස්මතු කළ අවස්ථාවල මතුකැරෙන විශේෂ ශෝකාන්ත ස්වභාවය සිතට කාවද්දන රස තෘප්තිය විස්මිතය.
Share on :

0 comments:

Post a Comment

 
© Copyright Gurugedara Magazine 2012 - Some rights reserved | Powered by Gurugedara.
Template Design by Sandeepa Madushan | Published by Gurugedara Templates and Theme4all