පිරිසිදු රුධිරය පිට නොවීමෙන් හිසට බලපෑමක්‌ වේය යන පැරණි කතාවේ සත්‍යයක්‌ තිබේද?
ඔසප්වීම හෙවත් ආර්තවය මසකට වරක්‌ තරුණ කාන්තාවකට සිදුවන සිදුවීමකි. මෙහි දී සිදුවන්නේ ඩිම්බ කෝෂයකින් පිටවන ඩිම්බයක්‌ සංසේචනයෙන් පසු ගැබ් ගැනීම සඳහා සූදානම් වූ ගර්භාෂ පටලයේ ගැබ් ගැනීමක්‌ සිදු නොවීම නිසා ගැල වී යැමයි. මෙම පටලය ගැලවී යන විට ඒ අවට ඇති රුධිර නාල කැඩී යැමෙන් රුධිර වහනය සිදුවේ. දින කිහිපයකට පසුව එම පටලය නැවත වර්ධනය වීම ඇරඹීමත් සමග රුධිර වහනය නවතී. මෙම රුධිර වහනය හෙවත් ඔසප් වීම සිදුවන්නේ ඩිම්බ පිටවීමට සමගාමීව ය. ඔසප් වීමේ ඇති වැදගත්කම වන්නේ ඉන් ඩිම්බ පිටවීම සිදුවන බව තහවුරු වන බැවිනි.
මෙම ඩිම්බ පිටවීම සමග අත්වැල් බැඳගත් හෝමෝන විපර්යාස ගණනාවක්‌ ඇත. ඒවා මගින් ශරීරයේ බොහෝa වෙනස්‌කම් සිදුකෙරේ. උදාහරණයක්‌ ලෙස කාන්තාවකගේ මුහුණේ, පපු ප්‍රදේශයේ රෝම වැවීම, කුරුලෑ ඇතිවීම, ස්‌ථුල භාවය ඇතිවීම වැනි දෑ ඔසප් වීම අපිළිවෙළට සිදුවන කාන්තාවන්ගේ දැකිය හැක.
ඔසප්වීම පිළිවෙළට සිදුවීම වැදගත් වන්නේ මම හේතුන් නිසාවෙනි. එනම්, ඩිම්බ පිටවීම පිළිවෙළට සිදු නොවන විට ගැබ් ගැනීමේ ගැටලු ඇතිවේ. ඊට අමතරව හෝමෝනවල ක්‍රියාකාරීත්වය වෙනස්‌ වීම මගින් සිරුරේ වෙනත් ස්‌ථානවල ගැටලු ඇතිවේ. සාමාන්‍ය ව්‍යවහාරයේ ඔසප් වීම, ඇඟ සුද්ද වීම යන නමින් හැදින් වූ අතර ඇතැම් අය මෙම ඇඟ සුද්ද වීම ශරීර සෞඛ්‍යයට ඉතා වැදගත් දෙයක්‌ ලෙස සැලකූහ. ඔවුන්ගේ මතය වුයේ සිරුරෙන් කිලිටි රුධිරය මෙලෙසින් මසකට වරක්‌ ඉවත් වීම සිදුවිය යුතු අතර, එසේ නොවුවහොත් එම අපිරිසිදු තත්ත්වය සිරුරේ වෙනත් අවයව වලට හානිකර විය හැකි බවයි. විශේෂයෙන් ම හිසට කිලිටි රුධිරය ඇතුල් වීමෙන් හානි සිදුවන බවයි. නමුත් සත්‍යය වන්නේ ඔසප් වීමේදී සිදුවන්නේ සාමාන්‍යයෙන් තුවාලයක්‌ වූ විට රුධිරය වහනය වන්නාක්‌ මෙන් රුධිරය පිටවීමයි. එබැවින් මෙලෙස රුධිරය පිටවිම නිසිලෙස කාන්තාවගේ සෞඛ්‍යයට බලපාන්නේ නැත. වැඩිපුර රුධිරය පිටවීමෙන් නීරක්‌තිය වැනි තත්ත්වයන් ඇතිවේ. නමුත් එය සිදුවන්නේ වෙනත් ගැටලුකාරී තතත්aවයන් ඇති විටයි.
වැඩිවිය පැමිණි මුල් මාස කිහිපය තුළ ඔසප් වීම පිළිවෙළින් සිදුනොවීම සාමාන්‍ය දෙයකි. ඊට හේතුව වන්නේ මෙම මුල් ඔසප් චක්‍රය ඩිම්බ පිටවීමක්‌ නොමැතිව සිදුවීය හැකි බැවිනි. නමුත් වසර කීපයක්‌ යන විට ඩිම්බ පිටවීම පිළිවෙළින් සිදුවන බැවින් ඔසප් වීම පිළිවෙළින් මාසිකව සිදුවේ. චක්‍රය දින කිහිපයකින් අඩු වැඩි වීම සිදුවිය හැකි නමුත් මාස කීපයකට වරක්‌ ඔසප් වීම සිදුවේ නම් මේ සඳහා වෛද්‍ය උපදෙස්‌ ලබා ගත යුතුය.
බොහෝවිට ඔසප් වීමේ අපිළිවෙළ සමග ඇතිවෙන හෝමෝන වෙනස්‌කම් නිසා සමෙහි ඇතිවන ගැටලු කාන්තාවන්ට පීඩාකාරී වේ. මෙවැනි අවස්‌ථාවලදී බොහෝ කාන්තාවන් චර්ම රෝග අංශය වෙත යොමු වීම සිදුවේ. මෙහිදි ඔසප් වීම අපිළිවෙළ බව වෛද්‍යවරයාට දැන්වීම වැදගත් කරුණකි. මෙවැනි තත්ත්වයන් බොහෝවිට ඖෂධ ගැනීමෙන් පාලනය කරගත හැක. මාස කීපයක්‌ හෝ වසරක්‌ දෙකක්‌ ප්‍රතිකාර ගැනීමෙන් මෙම තත්ත්වයන් බොහෝ දුරට පාලනය වේ. ස්‌ථුල කාන්තාවක්‌ නම් ඖෂධ ගැනීමට වඩා සිරුරේ බර අඩු කර ගැනීමට උත්සහ කළ යුතුය. ව්‍යායාම කිරීමෙන් සහ ආහාර අඩු කිරිමෙන් ස්‌ථුලභාවය අඩු කර ගැනීම පමණක්‌ ම මෙම තත්ත්වය පාලනය කිරීමට ප්‍රමාණවත් වේ. මේද ස්‌ථරය තුළ හෝමෝන විපර්යාස සිදුවීම මෙම රෝගී තත්ත්වයට බලපාන බැවින් ශරීරයේ මේද ප්‍රමාණය අඩු කිරීම මෙහිදී වැදගත් වේ.
මෙවැනි කාන්තාවන් තුළ කොලෙස්‌ටරෝල් වැඩිවීම, රුධිර සීනි වැඩිවීම වැනි ගැටලු සහිත තත්ත්වයන්ද ඇතිවීමට ඉඩ ඇත. ස්‌ථුලභාවය අඩු කිරීම මෙම තත්ත්වයන් පාලනය කිරීමටද ඉවහල් වේ.
තම්බපන්නි ඇසුරින් පල කරන ලදී.
0 comments:
Post a Comment