ඊජිප්තුව යළි කැළඹෙයි මුබාරක් එපා වූ රටවැසියන්ට දැන් මුර්සිවත් එපා වෙයි

මේ වෙද්දී ඊජිප්තුව නැවතත් මැද පෙරදිග උද්ඝෝෂණ රැල්‍ලේ කරළියට පැමිණ සිටියි. එදා එනම් 2011 වසරේ ඊජිප්තු උද්ඝෝෂණ ඇරඹුණේ හොස්නි මුබාරක්ට එරෙහිවයි. මෙදා යළි උද්ඝෝෂණ ඇරඹුණේ මුබාරක්ගෙන් පසු ජනපති ධුරයට ආ මොහොමඩ් මුර්සිට එරෙහිවයි. ඒ අනුව ඊජිප්තු ජනතාවට මුබාරක් සේම මුර්සිවද එපා වී ඇති සෙයක් පෙනේ. පසුගිය වසරේ සිට ඊජිප්තුවට උදා වී ඇති අපල කලදසාවේ වත්මන් කතාවයි මේ.

මෙවර ඊජිප්තුව දෙකඩ කිරීමට බලපෑවේ ජනපති මොහොමඩ්  මුර්සි තමන් වෙත නව බලතල පවරා ගැනීමට ගත් ක්‍රියාමාර්ගයයි. නිවසේ සිටම සිය බලතල  තහවුරු කර ගැනීමට මුර්සි ගත් පියවර බලය ඉක්මවා යාමකි. අනෙක් අතට එය බොළඳ දේශපාලන තීරණයක්ද වේ.  මුර්සි නම් කියන්නේ ඊජිප්තු  විප්ලවය  ආරක්ෂා කිරීමට මේ පියවර ගත් බවයි. තම තීන්දු තීරණවලට අභියෝග  කළ හැකි වෙනත් කිසිදු බල අධිකාරයක්  නොමැති බව 

ජනාධිපතිවරයා නිකුත් කළ නිවේදනයේ සඳහන්ව ඇත.  එහිදී ඊජිප්තු විප්ලවය හා ජාතික  ආරක්ෂාව සුරැකීමේ ඕනෑම පියවරක් ගැනීමේ බලය ඔහු සතුවේ. නීති සම්පාදන මණ්ඩලය විසුරුවා හැරීමට  අධිකරණයට ඇති බලයද  මෙමගින් තහනමට ලක් කර තිබේ. කොහොමටත් ඊජිප්තුවේ සිටින විනිසුරුවන්ගෙන්  වැඩි දෙනෙකු  එම ධුරවලට පත්ව ඇත්තේ මුබාරක්ගේ පාලන සමයේදීයි. ඒවා සෘජුවම දේශපාලන  පත්වීම් නොවුණද ඔවුන් මුබාරක්ගේ පාලනයට තවමත්       පක්ෂපාතීත්වය දක්වන බව ඊජිප්තු වැසියන්ගෙන් වැඩි දෙනෙක්ගේ විශ්වාසයයි. ජනපති මුර්සි අධිකරණ  බලතල සීමා  කිරීමට පියවර ගත්තේ  මන්දැයි ඒ අනුව පෙනේ. මුර්සි ජනපති ධුරයට පත්වූ වහාම ඔහු කළේ හිටපු ජනපති මුබාරක්ටත් ඔහුගේ පවු‍ලේ උදවියටත් ඔහු යටතේ සිටි රාජ්‍ය නිලධාරීන්ටත් එරෙහිව එල්ල වී තිබූ අපරාධ චෝදනා යළි විමර්ශනයට ලක් කිරීමයි. විප්ලවය අතරතුරදී ඝාතනයට ලක්වූ විරෝධතාකරුවන් ගැන මෙන්ම දූෂණ චෝදනා  සම්බන්ධයෙන්ද ගොඩගැසී  තිබූ නඩු විභාගයට ගැනීම කෙරෙහි මෙහිදී මුර්සි වැඩි අවධානයක් යොමු කළේය. විනිසුරුවන් සම්බන්ධයෙනුත් විරෝධතාකරුවන් ඝාතනයට ලක්වීම සම්බන්ධයෙනුත් මුර්සි ගත් ක්‍රියා මාර්ගවලට වැඩි දෙනෙක් සහය පළ කිරීමේ ඉඩක් තිබුණද ඔහු එය ක්‍රියාවට නැගූ ආකාරය මතභේදකාරී  තත්ත්වයක් උදා කිරීමට  හේතු විය. මුර්සි ඉදිරිපත් කළ න්‍යාය  ඊජිප්තු විප්ලවය සුරැකීමක් නොව ඔහුගේ  බලය ඉහළ නංවා ගැනීමක් බවට ඒත්තු ගිය තැන ඊජිප්තු වැසියෝ පන්දම අතට ගත්හ.  ඒ අනුව  ඔවුන් වීදි බැස උද්ඝෝෂණ කළේ මුර්සිගේ පාලනයද එපා යැයි  කියමිනි. හොස්නි මුබාරක්ටත් වඩා වැඩි බලයක් කරා ඔහු ගියේ ඒකාධිපති පාලකයෙකුගේ  චරිතයකට පණ දෙමිනි. එය හරියට ප්‍රජාතන්ත්‍රවාදය කරා ඊජිප්තුව යන ගමනේදී සිදු වූ පීලි පැනීමක් බඳුවේ. දැන් ඊජිප්තුවේ තත්ත්වය මීට දශක කිහිපයකට කලින් එරට පැවති හමුදා ඒකාධිකාරය සිහි  ගන්වයි.

ඊජිප්තුවේ මුස්ලිම් සහෝදරත්ව පෙරමුණ නියෝජනය කරන මුර්සි ඉස්ලාමීය බලය ඉහළ නැංවීමට ක්‍රියා කරන බවටද මෙහිදී චෝදනා එල්ල වී තිබේ. මේ හරහා  ඊජිප්තුවට ඉස්ලාමීය ව්‍යවස්ථාවක් හඳුන්වා දීම යටි අරමුණ බවට පත්ව ඇති සෙයක් පෙනේ. මුර්සි ගත් පියවර ඊජිප්තුව දෙකඩ කිරීමට තරම් ප්‍රබල අර්බුදයක් වූයේ ඒ නිසාවෙනි. දැන් මේ අර්බුදයේ එක් පැත්තක ඉස්ලාමීයෝ සිටියදී අනෙක් පසින්  නිකායවාදීහු, ලිබරල්වාදීහු හා ක්‍රිස්තියානුවෝ  වෙති. ඒ අනුව මෙය නිකාය වාදී ගැටුමක් බවට පත්වේදෝයි බියක්ද වේ. දැන් දැන් ඒ බිය දෙගුණ තෙගුණ වෙමින් තිබේ. මෙය කවදා කෙසේ විසඳුණද එය ඊජිප්තුවේ තවත් සංධිස්ථානයක් සනිටුහන් කරන්නක් වනු ඇති බවට නම් සැකයක්  නොවේ. රටේ ඉදිරි අනාගතය තීරණය කරන්නා  වූ විශාල පිම්මක් පැනීමට මෙහිදී ඊජිප්තුවට සිදුවේ.  එය ඊජිප්තුවේ  පමණක් නොව මැද පෙරදිග ගමන් මගද තීරණය කරන්නක් වනු ඇත.

කෙසේ වුවද මුබාරක්ගේ පාලනය එපා කියා මුර්සි ජනපති පුටුවට ගෙන ඒමෙන් ඉඟුුරු දී මිරිස් ගත්තා හා සමාන සිද්ධියකට දැන් ඊජිප්තු වැසියෝ මුහුණ දී ඇති සෙයක් පෙනේ.

ලක්බිම ඇසුරින් පලකරන ලදී.