ගීත ලොවේ ළයාන්විතයා වූ කීර්ති පැස්කුවල් ගේ උපන් දිනය පසුගියදා යෙදී තිබුණා. ඒ
නිමිති කොට ගෙන කීර්ති අපූරු සමාජ සද්කාර්යයක් සිදුකළා. ඒ කෝට්ටේ පාගොඩ පාරේ ආනන්ද
බාලිකා ළමා නිවාසයේ නේවාසික මවුපියන් අහිමි දූදරුවන් සමඟ එක්ව සිය උපන් දිනය
සමරමින් ‘නිල් ආකාසේ’ ළමා ගීත ඇල්බමය එහි දී එළිදැක්වීමයි. මේ කටයුතු අතරේ සිදුවූ
තවත් එක් අපූරු සිදුවීමක් ගැන අපිට දැනගන්නට ලැබුණා.
කීර්ති තමාගේ උපන් දිනය සමරන්න කලා ලොවේ හිතවතුන්ට හිතවතියන්ටත් එතැනට පැමිණීමට
ආරාධනා කර තිබුණා. මේ අවස්ථාවට ප්‍රවීණ ගායක නිහාල් නෙල්සන් ද සහභාගි වුණා. මල්
පොකුරු, තෑගි පාර්සල් රැගෙන කලා ලොවේ හිතවතුන් කීර්තිට සුබ පැතුම් එක් කළා. නමුත්
නිහාල් කීර්තිට කිසිම තෑග්ගක් හෝ මල් පොකුරක්වත් ගෙනැවිත් තිබුණේ නැහැ. ඔහු
සුපුරුදු ළෙන්ගතු සිනහවෙන් කීර්ති අසලට ගොස් හදවතින් ම සුබ පතා කීර්තිව වැලඳගෙන,
“මම අනිත් යාළුවො වගේ කීර්තිට තෑගි බෝග මල් පොකුරු නම් ගෙනාවෙ නැහැ. ඒත් මාත් එක්ක
මගේ කාර් එක ගාවට යන්න එන්න ඕනෙ” නිහාල් කීර්තිට සුබපැතුම් එක්කරන ගමන් පැවසුවා.
ඒ ඇරියුම පිළිගෙන කීර්ති නිහාල්ගේ මෝටර් රථය වෙත ගියා. ඒ තුළ රුපියල් විසිදහසක් පමණ
වටිනා කරවල, සහල්, එළවුළු, තුනපහ ආදිය පිරී තිබුණා. මේවා දැකපු කීර්තිට කාරණය
වැටහුණා. ‘මේ හැමදේම ගෙනාවෙ ළමා නිවාසයේ දරුවන් වෙනුවෙන්’. ඒ අයට. නිහාල් පැවසුවා.
නිහාල් සිදු කළ ඒ උතුම් කාර්යය නිසා කීර්තිගේ උපන්දින සැමරුම තවත් අර්ථවත් වුණා.
අපි මේ සිදුවීම වාර්තා කළේ වර්තමානයේ උපන්දින වෙනුවෙන් සුපිරි හෝටල්වල සාද
පවත්වමින් හුදෙක් හිස් විනෝදයක් හා හිස් ජනප්‍රියත්වයක් ලබාගන්නට වෙහෙසෙන ඇතැමුන්ට
ආදර්ශයක් වන ලෙසයි.
0 comments:
Post a Comment