Photobucket

Tuesday, January 15, 2013

ඔස්ට්‍රේලියාවට සුපිරි කැඳවීමක්

ශ්‍රී ලංකාව වෙතින් පෙරේදා ඇඩිලේඩ් හි දී කඩුලු අටක පරාජයක් ලැබූ ඔස්ට්‍රේලියාව ඉදිරි තරග සඳහා ඔවුන්ගේ සුපිරි ක්‍රීඩකයන් වහාම කැඳවා තිබේ.

පිතිකරුවන් වන මයිකල් ක්ලාක්, ඩේවිඩ් වෝනර් හා කඩලු රකින පිතිකරු මැතිව් වේඩ් මෙසේ කැඳවා ඇති ක්‍රීඩකයෝ වෙති. මේ ක්‍රීඩකයන් එළැඹෙන සිකුරාදා (18) බ්‍රිස්බන් සහ ඉරිදා (20) සිඩ්නි හි ශ්‍රී ලංකාව ට එරෙහිව පැවැත්වෙන තෙවැනි හා සිවුවැනි ජාත්‍යන්තර එක්දින තරගවලදී ඔස්ට්‍රේලියානු කණ්ඩායමට ක්‍රීඩා කරනු ඇත.

මීට අමතරව මේ තරග සඳහා ඔස්ට්‍රේලියාව ඔවුන්ගේ තුන් ඉරියව්වෙන්ම කැපී පෙනෙන ක්‍රීඩක මොයිසස් හෙන්රික්ස් ද කණ්ඩායමට ඇතුළත් කර තිබේ.

ඔහු ජාත්‍යන්තර තරග සඳහා මේ කැඳවුම ලබන්නේ 2009 වසරෙන් පසුව ප්‍රථම වතාවටය. බ්‍රිස්බන් නුවර ගබා ක්‍රීඩාංගණ තණතීරුවේ ස්වභාවය බොහෝ විට හෙන්රික්ස් ගේ පන්දු යැවීමට ගැළපෙන බැවින් ක්‍රිකට් ඔස්ට්‍රේලියා ජාතික තේරීම් පැනලය ඔහු කැඳවා තිබේ.

තරුණ ක්‍රීඩකයකු වන හෙන්රික්ස් පසුගිය වසර කිහිපය තිස්සේ පිත්තෙන් මෙන්ම පන්දුවෙන්ද තමාට හොඳ අනාගතයක් ඇතැයි පෙන්නුම් කර තිබේ. වේග පන්දු යැවීමේ මෙන්ම තුන් ඉරියව්වේම දක්ෂයකු ලෙසින් ඉස්මතු වීමට මෙය ඔහුට ලැබී ඇති මහඟු අවස්ථාවකි. 

ඇඩිලේඩ් තරගයට සහභාගී නොවූ වේග පන්දු යවන්නන් වන මිචල් ස්ටාක් හා මිචල් ජොන්සන් ගේ ශරීර සෙෘඛ්‍ය තත්ත්වයන් දැන් යහපත් අතට හැරී ඇති බැවින් මේ දෙදෙනාද ඉදිරි තරග සඳහා කණ්ඩායමට ඇතුළත් කර ඇත. ඒ අනුව බෙන් කටිං හා කේන් රිචර්ඩ්සන්ට ඔවුන්ගේ ස්ථාන අහිමි වී තිබේ.

කටිං, ඇඩිලේඩ් තරගයේ ඕවර 10ක් යවමින් ලබා ගත්තේ ලකුණු 42කට එක් කඩුල්ලක් පමණි. එහෙත් රිචර්ඩ්සන් ඕවර හයක් යවමින් ලබා දුන්නේ ලකුණු 15ක් පමණි. කිසිම කඩුල්ලක් ලබා නොගත්තද ඔහු යැවූ ඕවර හයෙන් තුනක් ම ලකුණු ලබා නොදුන් ඒවා වූහ. 

තේරීම් නිලධාරීන් විසින් ආරම්භක පිතිකරු ඒරන් ෆින්ච්, අංක 3 පිතිකරු උස්මාන් කවාජා සහ ස්ටීව් ස්මිත් කණ්ඩායමෙන් ඉවත් කර තිබේ.

ෆින්ච්, ශ්‍රී ලංකාවට එරෙහිව මෙල්බර්න් හා ඇඩිලේඩ් හි පැවැති පළමු හා දෙවැනි තරග දෙකේදීම පිතිකරණයේ අසාර්ථක වෙමින් ලබා ගත්තේ ලකුණු 16ක් හා 4ක් පමණි.

පළමු තරගයට පමණක් ක්‍රීඩා කළ කවාජා දුවද්දී දැවී යන විට රැස්කර ගෙන සිටියේ ලකුණු 3ක් පමණි. දෙවැනි තරගයට පමණක් සහභාගි වූ ස්මිත් ලබා ගත්තේ ලකුණු 8ක් පමණි.

ඇඩිලේඩ් තරගයේදී පාදයේ ආබාධයකට ලක්වීම හේතුවෙන් කඩුලු රකින පිතිකරු බ්‍රැඩ් හැඩින් ද කණ්ඩායමට ඇතුළත් කර නැත. 

ඔස්ට්‍රේලියාව කඩුලු අටකින් පරාජය වූ ඇඩිලේඩ් තරගයේ හැඩිං අර්ධ ශතකයක් ලබා ගනිමින් හොඳ කාර්යභාරයක් ඉටු කළද ඔහුගේ කණ්ඩායම ඉනිමේ තවත් පන්දු 19ක් ඉතිරිව තිබියදී දැවී ගියේය.

ඔස්ට්‍රේලියා සංචිතය: මයිකල් ක්ලාක් (නායක), ජෝර්ජ් බේලි, සේවියර් ඩොහර්ටි, මොයිසස් හෙන්රික්ස්, ෆිල් හියුස්, ඩේවිඩ් හසී, මිචල් ජොන්සන්, ග්ලෙන් මැක්ස්වල්, ක්ලින්ට් මැකේ, මිචල් ස්ටාක්, මැතිව් වේඩ්, ඩේවිඩ් වෝනර්.
Share on :

0 comments:

Post a Comment

 
© Copyright Gurugedara Magazine 2012 - Some rights reserved | Powered by Gurugedara.
Template Design by Sandeepa Madushan | Published by Gurugedara Templates and Theme4all