ආසියානු යොවුන් ක්‍රීඩා උළෙලට චීනයේ නැන්ජින් ඉහලින්ම සූදානම්

වසර 2017 හම්බන්තොටට ආදර්ශ සපයන

ආසියාවේ යොවුන් ක්‍රීඩක ක්‍රීඩිකාවන්ගේ පදක්කම් සිහින සැබෑ කිරීමට ඇති දැවැන්තම ක්‍රීඩා උළෙල පැවැත්වීමට තවත් මාස 8ක් පමණ තිබියදී එහි සංවිධායකයෝ හොඳින් සූදානම්ව සිටිති. චීනයේ නැන්ජින් හිදී මේ වසරේ අගෝස්තු 16සිට 24වැනිදා දක්වා පැවැත්වෙන මේ ක්‍රීඩා උළෙලේ ඊළඟ අවස්ථාව වසර 2017දී හම්බන්තොටට ලැබී ඇත.

එහෙයින් චීනයේ පැවැත්වෙන යොවුන් ආසියානු ක්‍රීඩා උළෙල ශ්‍රී ලංකාවට ආදර්ශ ගණනාවක් සපයනු ඇත. එබැවින් මෙවර පැවැත්වෙන ආසියානු යොවුන් ක්‍රීඩා උළෙල සෑම අංශයකින්ම ශ්‍රී ලංකාවට වැදගත් වේ.

ආසියානු යොවුන් ක්‍රීඩා උළෙලට රටවල් 45කින් ක්‍රීඩක ක්‍රීඩිකාවෝ 2300ක් හා නිලධාරීන් 1200ක් චීනයේ නැන්ජින් වෙත පැමිණෙනු ඇතැයි එහි සම්බන්ධිකරණ කමිටුව පවසයි. මලල ක්‍රීඩා, බැඩ්මින්ටන්, ෆෙන්සින්, බාස්කට්බෝල්, පාපන්දු ගොල්ෆ්, ජූ‍ඩෝ, හෑන්ඩ්බෝල්, රගර් සෙවන්ස්, වෙඩිතැබීම, පිහිනුම්, ස්කොෂ්, ටේබල් ටෙනිස්, ටෙනිස් හා බර ඉසිලීම වැනි ක්‍රීඩා 15ක් පැවැත්වීමට තීරණය වී තිබේ.

ක්‍රීඩා 15 පැවැත්වෙන ක්‍රීඩාංගණ හා පුහුණු මධ්‍යස්ථාන මේ 31වැනිදාට පෙර අවසන් කිරීමට ද චීන ක්‍රීඩා බලධාරීහූ පොරොන්දු වී ඇත. මාධ්‍යවේදීන් 500කට නවීන පහසුකම් සහිත මාධ්‍ය මධ්‍යස්ථානයක් ඉදිකොට ඇති අතර 2වැනි ආසියානු යොවුන් ක්‍රීඩා උළෙලේ නිල වෙබ් අඩවියද විවෘත කොට ඇත. ක්‍රීඩා උළෙලේ සංවිධාන කටයුතු වෙනුවෙන් ස්වේච්ඡා සේවකයන් 15000ක් පුහුණු කිරීමේ කටයුතු ද දැන් සිටම ආරම්භ කොට තිබීම විශේෂත්වයකි.

නැන්ජින් ඔලිම්පික් ක්‍රීඩා මධ්‍යස්ථානයට කිලෝමීටර් 16ක් දුරින් කාමර 900කින් යුත් නිවාස සංකීර්ණයක් ක්‍රීඩා උළෙල වෙනුවෙන්ම ඉදිකිරීමට ද සංවිධායකයෝ කටයුතු කරති. මේ අප්‍රේල් මාසයේ දී මුළුමනින්ම වැඩ නිමවන එම නිවාස සංකීර්ණය ක්‍රීඩා උළෙලින් පසුව නැන්ජින් විශ්ව විද්‍යලයේ ගුරුවරුන්ගේ නේවාසික පහසුකම් වෙනුවෙන් වෙන්කිරීමට අපේක්ෂා කෙරේ.

වසර 2014දී යොවුන් ඔලිම්පික් ක්‍රීඩා උළෙල ද නැන්ජින් හී පැවැත්වෙන බැවින් ආසියානු යොවුන් ක්‍රීඩා උළෙලට ඉහළම පහසුකම් ලබාදීමට හැකියාව ලැබී ඇතැයි සංවිධායක‍යෝ පවසති. 

ආසියානු යොවුන් ක්‍රීඩා උළෙල මුල්වරට 2009දී සිංගප්පූරුවේ පැවැති අතර එහිදී රන් පදක්කම් 25ක් දිනූ චීනය පළමු තැනට පත්වූ අතර දකුණු කොරියාව (රන් 20) දෙවැනි ස්ථානය ද, තායිලන්තය (රන් 11) තෙවැනි ස්ථානය ද දිනා ගත්හ.

ශ්‍රී ලංකාව 16වැනි ස්ථානයට පත්වූයේ රිදී පදක්කමක් හා ‍ලෝකඩ පදක්කම් දෙකක් සමගිනි. එම පදක්කම් තුනම මලල ක්‍රීඩා ඉසව්වලදී දිනා ගැනීම විශේෂත්වයකි.