නකල්ස් සහ වස්ගමුව රක්ෂිතවල සිර වූ පිරිස් ගලවා ගන්න මෙහෙයුම්

නකල්ස් රක්ෂිතය නරඹන්න ගිය පවුල් පහළොවකට අයත් පුද්ගලයන් 67 දෙනෙක් හෙට්ටිපොළ, මහලකොටුව ප්‍රදේශයේ සිර වී සිටිති. යළි පැමිණෙන්නට තිබෙන ලග්ගල මාර්ගය,තෙල්ගමුව ඔය පිටාර ගැලීමෙන් අඩි හයක් පමණ උසට යට වී තිබේ. රත්තොට මාර්ගය මත පස් කඳු සහ ගස් කඩා වැටීමෙන් එම මාර්ගයද අවහිර වී ඇත. මොවුන් පිරිස කොළඹ පදිංචිකරුවන් බව කියති.

ඉකුත් 16 වැනිදා මෙම පිරිස නකල්ස් රක්ෂිතයට ඇතුළු වී ඇති අතර ඉන් පිටවන්නට මගක් නැතිකම නිසා ඔවුන් සියලු දෙනාට මහළකොටුව ගම්මුන් විසින් ආරක්ෂාව සහ නවාතැන් පහසුකම් සලසා දී ඇත.මෙම කණ්ඩායමේ කුඩා දරුවන්ද වෙතැයි වාර්ථා වන අතර පිරිස ආහාර හිඟයකට මුහුණ දී සිටිති. මේ අතර ඊයේ (17) උදේ ලග්ගල, වස්ගමුව නරඹන්නට ගිය තරුණියන් දස දෙනකු වස්ගමුව වනෝද්‍යානයේ සිරි වී සිටිති. මොවුන් මහනුවර, පූජාපිටියේ පදිංචිකරුවන් බව කියන අතර නිසි ප්‍රවේශ මාර්ගවලින් මොවුන් වනයට ඇතුළු වී නැතැයි වාර්ථා වී ඇත. මහවැලි ගඟ පිටාර ගැලීම හේතුවෙන් මොවුන් එහි කොටු වී සිටිති. විල්ගමුව පොලිසිය සහ යුද හමුදාව මෙම තරුණියන් ගලවා ගැනීමේ මෙහෙයුමක් අරඹා තිබේ. දඹුල්ල ප්‍රදේශයේ ප්‍රධාන වැව් වාන් දමන්නට පටන් ගෙන ඇත. නාලන්ද ජලාශයේ අඩි 2 ½ ක් වාන් දොරටු විවර කර ඇත.

ඉදිරි පැය විසි හතරක කාලය තුළදී අඩි 4ක් දක්වා වාන් දොරටු විවර කරන්නට අදහස් කර ඇති බැවින් මහවැලි සහ අඹන්ගඟ දෙපස පදිංචිකරුවන්ට අවධානයෙන් සිටින ලෙසට දඹුල්ල වාරි ඉංජිනේරු එස්.බී.මැදිවක මහතා පවසයි. කෙසේ වෙතත් වාන් දොරටු විවර කරන්නට පෙර ගඟ දෙපස වැසියන්ට දැනුම් දෙන බවත් ඒ මහතා කියයි. මේ වනවිට පන්නලම ජලාශය අඩි 1 ½ කින්ද, වෑමැඬිල්ල ජලාශය අඩි 2 ½ කින්ද,දේවහූව ජලාශය අඩි 1 ½කින්ද වාන් දමන්නට පටන් ගෙන ඇත. ඉබ්බන්කටුව (දඹුල්ල) ජලාශය තත්පරයකට ඝන අඩි 5000ක් බැගින් වාන් දමන්නට ප‍ටන් ගෙන ඇති බවත් එහි වාන් දොරටු හතරක් විවර කර ඇති බවත් වාර්ථා වේ. මෙම ජලය කලාවැවට මුදා හරින බැවින් දඹුළු ඔය දෙපස ජීවත් වන ජනතාවට දැඩි අවධානයෙන් පසුවන ලෙස වාරිමාර්ග ඉංජිනේරුවරුන් ජනතාවගෙන් ඉල්ලා සිටිති. මේ අතර A 9 මාර්ගයේ මහනුවර සිට යාපනය දක්වා මාර්ගයේ අකුරණ, අලවතුගොඩ, බලකඩුව ප්‍රදේශ ජලයෙන් යට වීම හා ගස් කඩා වැටීම නිසා වසා දමා ඇත. විකල්ප මාර්ග ලෙසට කටුගස්තොට වත්තේගම, මාතලේ මාර්ගය ඔස්සේ A 9 මාර්ගයට පිවිසිය හැකිය.